Istigfar lan Azab

Poro sederek, jamaah Pengajian Rahimakullah..

Monggo sareng-sareng kito tingkataken taqwa kito dumateng Gusti Allah, inggih puniko kanti nglampahi perintah-perintahipun lan nebihi sedoyo awisanipun. Kanti taqwa puniko, InsyAllah kito termasuk tiyang-tiyang ingkang mulyo.

Jamaah Pengajian ingkang minulyo..

Wekdal-wekdal puniko, kito ningali lan ngraosaken kejadian-kejadian ingkang menyedihkan, kathah musibah ingkang ngenani negari kito. Musibah-musibah meniko arupi bencana alam ingkang mawerni-werni, wonten ingkan arupi banjir, gempa bumi, tanah longsor, gunung mletus lan sak panunggalanipun.

Kito sebagai tiyang ingkang beriman mesti yakin bilih musibah-musibah meniko pancen saking kersanipun pengeran. Musibah puniko boten namung gejala alam, ananging sampun dipun taqdiraken lan dipun kersaaken dening gusti Allah. Allah sampun ngendiko wonten Alquran:

أَعُوْذُ بِاللهِ مِنَ الشَّيْطَانِ الرَّجِيمْ :

مَا أَصَابَ مِنْ مُصِيبَةٍ إِلَّا بِإِذْنِ اللهِ ، وَمَنْ يُؤْمِنْ بِاللهِ يَهْدِ قَلْبَهُ ، وَاللهُ بِكُلِّ شَيْءٍ عَلِيمٌ (التغابن: 11)

Ingkang artosipun kirang langkung: Ora ngenani suwijining musibah kejobo kelawan ijine Allah, lan kang sopo wonge iman marang Allah mongko Allah bakal paring pituduh ing atine lan Allah iku moho ngerteni kabeh perkoro.  

Jamaah Pengajian ingkang minulyo..

Musibah ingkang ngenani manungso puniko saged dipun bagi werni kalih (2): Setunggal, musibah ingkang minongko ujian utawi cobaan tumrap tiyang mukmin. Tiyang gesang puniko boten lepas saking ujian lan cobaan, sami ugi cobo ingkang ngenani awak, bondo, pikiran, kesehatan lan sak panunggalanipun. Tumrape tiyang mukmin, cobaan puniko kedah dipun lampahi kanti sabar, tabah, lan ampun ngantos gadahi prasongko olo marang gusti Allah.

Kito tiyang mukmin mesti mangertosi bilih cobaan puniko kathah manfaatipun, ing antawisipun inggih puniko: saged nambahi kesahenan, saged nglebur doso lan saged dados peringatan supados kito sadar lan kerso tobat marang gusti Allah.

Poro sederek ingkang minulyo..

Dene werni musibah ingkang ongko kalih inggih meniko musibah ingkang minongko ukuman utawi azab saking Gusti Allah. Musibah ingkang arupi azab puniko dipun timpaake dening gusti Allah keranten manungso sampun kathah anggenipun maksiat, kathah nglampahi doso lan boten purun nderek pituduhipun poro rasul.

Allah sampun nerangaken wonten Alquran inggih puniko kisahipun poro umat sakderengipun kanjeng Nabi. Umat-umat puniko sami mbangkang, boten purun miderek dawuh nabinipun, akhiripun dipun ukum lan dipun binasaaken dening gusti Allah. Wonten ingkang dipun ukum kanti udan watu, petir ingkang ngglegar, gempa bumi, badai lan wonten ugi ingkang dipun keremaken kelawan banjir bandang. Kisah-kisah meniko saged dipun waos wonten Alquran Surat al-Ankabut.

Poro sederek ingkang kinurmatan..

Kito boten mangertos, musibah ingkang ngenani negari kito meniko minongko cobo punopo azab saking gusti Allah. Ananging kangge ngatos-atos monggo kito sami eling lan nglereni maksiat ingkang tasih dipun lampahi. Monggo kito tansah nyuwun ngapuro lan tobat marang gusti Allah supados bencana-bencana puniko saged leren. Monggo kito sami istigfar marang gusti Allah kanti tulus lan ihlas tur yakin bilih Allah puniko Dzat ingkang welas asih kalihan kawulanipun soho remen ngapuro doso-dosonipun manungso. Allah sampun ngendikaaken bilih senajan bencana puniko dipun sebabaken tumindak kito piyambak, ananging gusti Allah meniko moho paring pangapuro:

وَمَا أَصَابَكُمْ مِنْ مُصِيبَةٍ فَبِمَا كَسَبَتْ أَيْدِيْكُمْ وَيَعْفُوْ عَنْ كَثِيْر (الشورى: 30)  

Artosipun kirang langkung: Musibah ingkang ngenani siro kabeh iku mergo tumindake siro kabeh lan Allah puniko moho pangapuro..

Allah ugi sampun ngendiko bilih Allah boten bade nyikso marang setunggaling kaum ingkang sami maos istigfar:

وَمَا كَانَ اللهُ لِيُعَذِّبَهُمْ وَأَنْتَ فِيْهِمْ ، وَمَا كَانَ اللهُ مُعَذِّبَهُمْ وَهُمْ يَسْتَغْفِرُوْن (الأنفال: 33)

Artosipun kirang langkung: Allah ura arep nyikso maring kaum yen siro Muhammad ono ing kaum iku mou, lan Allah ura arep nyikso maring kaum yen kaum iku mou podo istigfar.

Dados umpami kito ngathah-ngathahaken istigfar, InsyAllah kito boten bade dipun sikso dening pengeran. Kanjeng Nabi ugi sampun ngendiko:

اَلْعَبْدُ آمِنٌ مِنْ عَذَابِ اللهِ عَزَّ وَجَلَّ مَا اسْتَغْفَرَ اللهَ عَزَّ وَجَلّ (حديث حسن رواه أحمد)

Kawulo puniko aman saking azab Allah selagine deweke nyuwun ngapuro/istigfar marang Allah.