Anjuran maos Alquran

Poro Sederek, jamaah Pengajian ingkang kulo hurmati..

Monggo sareng-sareng kito ningkataken taqwa kito dumateng gusti Allah, inggih puniko kanti nglampahi perintah-perintahipun lan nebihi sedoyo awisanipun.

Jamaah Pengajian ingkang dipun rahmati Allah,

Monggo sami bersyukur, keranten ngantos wekdal puniko kito tasih dipun anugrahi nikmat ingkang agung saking gusti Allah, inggih puniko arupi nikmat iman lan Islam. Kanti nikmat puniko lah, InsyaAllah kito saged selamet tuwin bahagia wonten dunyo punopo akherat.

Jamaah Pengajian ingkang minulyo..

Salah setunggaling nikmat ingkang ageng ugi, ingkang dipun anugrahaken kangge kito sedoyo inggih puniko kitab suci Alquran. Monggo kito mangertosi bilih Alquran puniko kitab ingkang dipun berkahi, kitab ingkang dipun turunaken dening Gusti Allah supados dados petunjuk, rahmat lan nasehat kangge kito sedoyo. Alquran ugi saged dados tombo tumrape manungso, sami ugi tombo kangge gerah badan punopo gerah jiwo. Allah sampun dawuh wonten Alquran:

أَعُوْذُ بِاللهِ مِنَ الشَّيْطَانِ الرَّجِيمْ

يَا أَيُّهَا النَّاسُ قَدْ جَاءَتْكُمْ مَوْعِظَةٌ مِنْ رَبِّكُمْ وَشِفَاءٌ لِّمَا فِي الصُّدُورِ وَهُدًى وَرَحْمَةٌ لِلْمُؤْمِنِينْ (يونس: 57)

Ingkang artosipun kirang langkung:

He.. poro manungso, yekti wes nekani ing siro kabeh mauidzoh/nasehat saking pengeran iro kabeh, lan tombo kanggo penyakit kang ono ing dodo lan petunjuk soho rohmat kanggo wong-wong kang podo iman.

Lan ingkang dipun maksud wonten ing ayat puniko inggih meniko Alquran.

Poro sederek ingkang kulo hurmati..

Salah setunggaling ibadah ingkang ageng ganjaranipun lan kathah manfaatipun inggih meniko maos Alquran. Kanjeng Rasul nate dawuh:

اِقْرَءُوا الْقُرْآنَ فَإِنَّهُ يَأْتِى يَوْمَ الْقِيَامَةِ شَفِيعًا لِأَصْحَابِهِ ... (رواه مسلم)

Ingkang artosipun kirang langkung: Podo mocoho siro kabeh ing Alquran, jalaran Alquran iku iso dadi syafaat sesuk ing dino kiamat. (H.R. Muslim)

Dados yen kito pengin dipun syafaati dening Alquran, mongko Alquran mou kedah kito waos.

Wonten ugi keterangan bilih griyo ingkang boten nate kangge maos Alquran puniko kados kuburan. Griyo meniko sepi, angker lan boten aman saking setan. Perkawis puniko sesuai kalihan dawuhe kanjeng Rasul:

لاَ تَجْعَلُوْا بُيُوتَكُمْ مَقَابِرْ ، إِنَّ الشَّيْطَانَ يَنْفِرُ مِنَ الْبَيْتِ الَّذِى تُقْرَأُ فِيهِ سُورَةُ الْبَقَرَةْ (رواه مسلم)

Artosipun kirang langkung: Ojo dadekno omahe siro kabeh koyo kuburan, saktemene setan iku mlayu soko omah kang diwacani Surat Al-Baqarah. (H.R. Muslim)

Miturut hadis meniko, yen kito kepengin griyo kito aman saking setan mongko kedah dingge maos Alquran, utaminipun Surat Al-Baqarah.

Pramilo saking puniko, monggo ampun ngantos griyo kito sepi saking waosan Alquran. Monggo kito milahi saking awak kito piyambak, nuli kito ajak kluargi kito asring maos Alquran.